2. 24. Ensement est ordeine qe artificers, gentz de mester, se tiegnent chescun a une mestere quele il vorra eslire entre cy et la dit feste de la chandelure. Et soient esluz deux de chescun mestere a surveer qe nul use autre mestere qe cele quele il ad eslu; ... . Mes l'entencion nostre seignur le roi est et son conseil \est/ qe femmes, c'estassaver braceresces, pesteresces, tisteresces, fileresces et oevresces sibien de leine come de liegne toile et de soie, broudesters, kardesters, pyneresces de leine et toutes autres qe usent et oeverent overaignes manueles, peussent user et overer franchement come eles ont fait avant ces heures, saunz nul empeschement ou estre restreint par ceste ordinance.
25. Item, monstrent les communes: qe come diverses vitailles dedeinz le roialme sont grandement encherrez, par cause qe diverses gentz de diverses condicions usent diverse apparaill nient appertenant a lour estat; c'estassaver, garceons usent apparaill des gentz de mestire, ...
Responsio.
... est ordeine par manere qe s'ensuit:
'Premerement, quant as garceons, sibien servantz as seignurs come de mestere et des artificers, ... q'ils eient draps pur lour vesture ou chauceure, dont le drap entier ne passe deux mars; et q'ils ne usent drape de plus haute pris de lour acat, n'autrement, ne nul chose d'or, d'argent, n'embroidez, aymelez ne de soye, ne rien appendant des dites choses. Et soient lour femmes, files et enfantz de mesme la condicion en lour vesture et apparaill; et ne usent nuls voiles passant la voile dousze deniers.
26. ... yomen ne preignent ne usent drape de plus haute pris pur lour vesture ou chauceure qe deinz quarante soldz le drape entier, par voie d'acat, n'autrement; ne perre, drape de soy, ne d'argent, ne ceynture, cotel, fermaill, anel, garter, n'ouches, rubans, cheisnes, bendes, sealx n'autre chose d'or ne d'argent, ne nul manere d'apparaill embroidez, aymelez ne de soy, par nul voie. Et qe lour femmes, files et enfantz soient de mesme la condicion en lour vesture et apparaill; et qe eles ne usent nul voile de soy, mes soulement de fil fait deinz le roialme, ne nul manere de pellure ou de bugee mes soulment d'aignel, conil, chat et gopil.
27. Item, qe esquiers et toutes maneres de gentils gentz desouz l'estat de chivaler qe n'ont terre ou rente a la value de cent livres par an ne preignent ne usent drape pur lour vesture ou chauceure de plus haut pris qe deinz le pris de quatre mars et demy le drape entier, par voie d'acat n'autrement; ne q'ils ne usent drape d'or, de soy ne d'argent, ne nul manere vesture embroidez, anel, fermaill n'ouche d'or, ruban, ceynture, ne nul autre apparaile ne hernies d'or ne d'argent, ne riens de perre, ne nul manere de pellure. Et qe lour femmes, filese et enfantz soient de mesme la condicion quant a lour vesture et apparaill, saunz ascun revers ou purfil; et qe eles ne usent esclaires, crimiles ne troefles, ne nul manere d'apparaill d'or, d'argent ne de perre. Mes qe esquiers eantz terre ou rente a la value de deux centz livres par an et outre peussent prendre et user drape du pris de cynk mars le drape entier, et drape de soy et d'argent, ruban, ceynture et autre apparaill resonablement garniz d'argent. Et qe lour femmes, files et enfantz peussent user pellure revers de menevoir, saunz ermyns ou letuses ou ascun manere d'apparaill de perre, sinoun pur lour testes. ...
Legal.
[LexP PROME (Ed. III: Parl. of Oct. 1363, items 24-25) 1363]
Body Parts: N/A.