2. [PROME XIII, Item 26]: Item, par la ou nostre dit seignur le roy en ad la subside et custume en la fourme contenue en le grant de ses communes; et entre autres, de chescun drape de scarlet, et autre drape d'entier grayn, une certeyn custume, ore est il ensy, qe certeyns merchantz aliens en la citee de Londres, et en autres villes demurrantz, ont prys et teignont grandes hostielx et meaisons, en les queles ils sont sole enhabitantz, et achatent ascun foitz come en un an mille ou deux mille draps de blanket fyne ou pluys, et les font teyntrere de lour grayn demesne, en scarlet, en sangwyn, et en autres colours d'entier grayn, ou de demy grayn, et puis font trenchier tieux draps a petites peces de .v. ou .vi. verges, ou de pluis ou de meyns, et ent font diverses garnementz, et les enpackent en lour ditz hostielx, et en mesmes les packes sotelment enpackent layn fyne, or et argent en plate, et ascun foitz ils mettent tiels layn, or, et argent en barrelx, et autres vesselx, et les amesnont hors de roialme sanz ascun custume ou subside paier pur ycelle, desouthe le colour de tielx garnementz issint faitz, par cause qe tielx garnementz ne sont pas custumables. Et issint nostre dit seignur le roy par tielx marchantz aliens, ensy en lour hostielx solement demurrantz, est de jour en autre grandement de soun custume et subside defraude et deceu, a grande damage et prejudice de luy en celle partie.
Soit ordeigne, qe toutz marchantz aliens desorenavaunt paient la subside et custume pur tielx garnementz solonc l'afferant: c'est assavoir, cy .iiij. ou .v. ou .vi. tielx garnementz conteigne un drap d'entier grayn, q'adonqes ils paient la custume et subside come pur un drape de scarlet, sy meyns meyns, et si pluis pluis. Et de les damages et deceytes par eux faitz a nostre dit seignur le roy avant ces heures soient commissions sur ceo faitz as certeins loialx et vaillantz hommes, par le counseille nostre dit seignur le roy assigners, pur enquerer et examiner par toutz maneres des voies qe la verite mielx purra estre trove, et de certifier en la chancellerie de cest matire en due fourme, pur le profit nostre dit seignur le roy; par consideracioun, qe les subside et custume sont de cy petit value come ils \sont/ ore a cause suisdite.
Responsio.
Le roy voet, qe cest article soit tenuz decyenavant en toutz pointz; et ceo auxibien des draps graynez come de toutz autres draps de layne. Et si rien soit fait ou attemptez devaunt ces heures a contraire de les estatutz sur ceo faitz, soient commissions faitz d'enquerre, et d'ent certifier en la chancellerie. [1]
Legal.
[AND RotParl1 (iii 626) 1410]
4. Dyvers Marchauntes, Straungers and Deynzeins, use to bryng into this Reame Clothes of Gold, Clothes of Sylver, Bawdekyns, Velvettes, Damaskes, Satens, Sarcenettes, Tarterons, Chamelettes ... do pakke in the Cite of London ... dyvers Wollen clothes, som grayned, some half grayned, and other Clothes not grayned
Legal.
[MED RParl. (6.154b-155b) 1472/1475]
