11. [Column b] Pur les gentz de l'artifice des ceinturers de Londres
18. Item, les ditz communes bailleront une autre supplicacione en mesme le parlement, pur les gentz de l'artifice et mistere de ceinturers de la citee de Londres, de la qelle supplicacione le tenure est cy ensuant:
Au treshonourable et tressoverain seignur le roy, et a les seignurs en ceste parlement assemblez, supplient les communes, pur les gentz de l'artifice et mistier de ceinturers de la citee de Loundres: qe come le roy Edward besaiel a nostre tressoverain seignur le roy q'ore est, par advys de soun counseille en soun parlement tenuz a Westm' l'an de soun regne primer, a la supplicacione des ceinturers du dite citee, par sez lettres patentz, les queux Richard nadgairs roy d'Engleterre, et nostre soverain seignur Henry, piere a nostre dit tressoverain seignur le roy, les queux Dieu assoille, ount severalment confermez, graunta, et conferma diverses ordinaunces, articles, et usages, devaunt par les ditz ceinturers pur le bien commune et profit de soun roialme faitz, les queux sount soubz escriptz. C'estassavoir, qe nulle homme du dit mistier fist garnier ceinture de soy, de lain, de quir, ne de file de lyne, de nul piere, metal, qe de laton, baterie, feer, et asser. Et qe en la dite citee soient eslutz par les gentz du dit mistier, un homme, ou deux hommes bones et loialx du dit mistier, pur la dite chose garder et serchier, et de ceo faire as toutz les foitz q'ils verront qe mistier serra. Et si \nulle/ oeveraigne des ceinturers soit garni de plum, peautre, ou d'estein, ou d'autre faux chose, soit par les ditz gentz du dite mistier issint eslutz presente devaunt le mair de la ditee citee, et par agarde de lui et les audermans soit la chose forfait, et par lour discretion les oeverours puniz pur lour faux oeveraigne; sicome en lez lettres et confirmacions avauntditz pluis au plein est contenuz. [2] Et ore lez gentz du dite mistier de la citee suisdit, es plusours lieux deinz le roialme, sount molt diffamez, a cause qe certeins gentz usantz la dite mistier demurantz en les suburbes du dite citee, et aillours pres et environe d'icelle citee, facent et garnisent diverses ceintures de faux oeveraigne, et de metal nemye covenable, ne profitable, mais desceivantz a la commune poeple, et encountre les ordinaunces, articles, et usages avauntditz, a graunde damage du poeple, et esclaundre des bones gentz, et loialx oeverours de mesme la mistier en la citee suisdit, pur tant qe des tielx maneres faux oeveraignes du dit mistier deinz la dite citee, et joust les suburbes d'icelle, venduz sibien par foreins come par autres aliens, les achatours d'icelle lour mesmes excusent es diverses villes du roialme as lour achatours, q'ils mesmes celle ceintures ensi oeverez avoient achatez, et furent oeverez en la cite suisdite.
Pleise a nostre dit seignur le roy, par auctoritee d'icest present parlement, de granter et ordiner, qe les gardeins du dit mistier deinz la dite citee, qi pur le temps serront, atant de temps que lour semblera affaire, a avoir et fair la serche et surviewe de tout ceo q'appartient au dite mistier, sibien deinz la citee suisdit, come aillours, pur l'espace d'une leuke en chescun partie tout environ icell citee, es queux mains les ceintures, ou l'oeveraigne d'icelle, serront trovez a oeverer ou a vendre, et de toutz les ceintures et l'oeveraign d'icelle, queux ils de temps en tempstrovent faitz encountre les ordinances, articles, et usages suisditz, deinz la dite citee, qe le mair et audermans de mesme la citee pur le temps esteantz, par presentement des ditz gardeins, facent l'execucione compriez en les ordinaunces et usages suisditz, es queux mains tielx maneres ceintures et oeveraignes ensi soient trovez a oeverer ou a vendre. Et auxi en toutz autres lieux \hors/ du dite citee par l'espace du dit leuke, eient les baillifs ou constables du ville, ou lieux, ou tiel defalte encountre les dites ordinaunces et usages serra trovee, pleine poair affaire mesme l'execucione d'icelle ceintures et oeveraignes, ensi es queux mains q'ils [p. 74; Column a] soient trovez a oeverer ou a vendre; et eient les seignurs dez fraunchises illeoqes les profitz de la correccione d'icelle, si auscunez y soient; aucune ordinaunce, estatut, ou graunt faite au contrarie noun obstant.
La qelle supplication leu en mesme le parlement, fuist [Membrane 9] respondu en la manere ensuant:
Le roy, del assent des seignurs espirituelx et temporelx esteantz en ceste present parlement, et a la supplicacione des ditz communes, voet, qe les gardeins du dite mistere dedeinz la dite citee pur le temps esteantz, \par auctorite/ du ceste parlement, eient le serche et la surveu de temps en temps, de tout ceo qe appartient a la dite mistere, parmy toute la franchise de mesme la citee tant soulement, et nonpas aillours. Et qe les mair et audermans du dite citee qe sont, et pur le temps serront, de toutz maners overaignes de mesme la mistere, queux par presentement des ditz gardeins soient trovez fauxement faitz, encontre les ordinances, articles, et usages, en les lettres patentz en la dite peticione especifiez contenuz, eient les correccione et punisement, et facent tiele agarde et execucione come es mesmes les lettres patentz sont limitez, et par ycelx lour est doneez, et ceo par l'auctorite suisdite.
Legal.
[AND RotParl1 (iv 73) 1416]
